حمي الساحل الشمالي
بقلــم: أحمد بهجت
استيقظ سيد افندي من نومه يوم الجمعة صافي المزاج رائق البال...
لايعرف لماذا؟
احيانا يستيقظ من نومه معتكر المزاج دون سبب, واحيانا يحدث العكس..
وفي جميع الاحوال لايعرف السبب...
قال لنفسه يوما, لعلها الشيخوخة وتقلبات العمر...
لم تمض دقائق علي احساسه بهذا الشعور الجميل حتي دخلت زوجته الحجرة..
بوزها شبرين وجبينها مقطب والعفاريت تلعب في عينيها سألت سيد أفندي
احنا في شهر ايه ياسيد...
عد سيد الشهور علي اصابع يديه وقال لها.. شهر سته
قالت له: شهر ستة خلاص خلص, احنا في شهر7 شهر يوليو..
قال سيد: أنعم واكرم... شهر الثورة..
قالت زوجته: مركز معايا ياسيد... انا مش جايه اتكلم في الثورة..
سألها: امال جاية تتكلمي في ايه... خشي في الموضوع دوغري ياتفيدة..
قالت: احنا في شهر المصيف... شهر الفسحة... شهر الساحل الشمالي.
قال سيد: وماله... ما احنا حنصيف زي كل سنه ما بنصيف..
ان شاء الله علي آخر اغسطس نسافر إسكندرية اسبوع واللا عشر ايام زي عادتنا
قالت الزوجة بانفعال
انا مش رايحة اسكندرية السنة دي..
سأل سيد: امال عاوزة تصيفي فين؟
قالت تفيدة: عاوزه اصيف في الساحل الشمالي
قال سيد: وماله... نصيف في الساحل الشمالي, نأجر اسبوع و الا عشر ايام..
قالت الزوجة: انا مش حصيف عشر ايام والا اسبوعين..
انا عاوزه اصيف في شاليه ملكي... في فيلا بتاعتي.. الدنيا كلها اشترت في الساحل الشمالي واحنا قاعدين نتفرج علي خيبتنا, علي رأي المثل..
كل الناس خيبتها السبت والاحد, واحنا خيبتنا مش علي حد..
تعكر مزاج سيد افندي وزايله احساسه بالروقان, سكت برهة ثم قال لزوجته.
انتي عارفة الفيلا في الساحل الشمالي سعرها كام..
قالت: حيكون كام يعني... يكون زي مايكون... انا اعصابي تلفت من قلة الخروج وقلة الفسحة... اتصرف ياسيد... انت لمابتعوز فلوس بتجيب فلوس..
قال سيد: اجيب منين ربع مليون والا نص مليون والا عاوزه الفيلا عالبحر ودي سعرها مليون
عاوزاني اسرق ياتفيده... بعد ماعشت طول عمري نضيف وشريف عاوزاني اسرق.
قالت الزوجة: ماحدش طلب منك تسرق, المطلوب منك انك تتصرف.. انت مش وارث فدانين ارض.. بيعهم وتشتري شالية بتمنهم.
قال سيد: ايوه كده.. انا فهمت غلط... افتكرتك عاوزه فيلا... إنما حيث انك عاوزه شاليه.. ده امره سهل وفلوسه معقولة, يعني حيخش له في200 ألف جنيه احنا معانا منهم130 جنيها يبقي ناقصنا كام..
نحسبها... ونعمل شراء الفيلا ده مشروعنا القومي... نشوف كل شهر ممكن نحوش كام.. ونشوف حنقعد كام شهر نحوش..
لو انتي مسكتي ايدك في المصاريف ممكن نحوش كل سنة ألف جنيه, بعد200 سنة نكون جمعنا المبلغ نبني الشالية علي راحتنا..
ولما ييجي شهر يوليه نبقي نروح في أغسطس نقعد لنا عشر أيام والاشهر في الشالية.
كان وجه الزوجة يتلون وسيد أفندي يحدثها, فلما وصل إلي هذا الجزء من حديثه نهضت الزوجة واقفة وقالت بحسم.
أنت بتهرج ياسيد... وأنا بتكلم جد..
أنا اتوكست ياسيد... طول عمري بختي مايل, أنا مش حتناقش معاك, لكن انا حقول لك كلمة واحدة... اتصرف..
أنت مش لك اصحاب... ضروري حد فيهم غني.. استلف منه, أو بيع الارض اللي عندك.. اتصرف ياسيد.. المهم انك تتصرف
قالت عبارتها الاخيرة وخرجت ثائرة من الغرفة.
لم يكدب سيد افندي الخبر... وفاتح صديقه عم عبده في الموضوع, سأله ـ أنت غني ياعم عبده, قال له الحمدلله, قال له عاوز200 ألف جنيه عشان مراتي عاوزه شالية في الساحل الشمالي, وضحك عم عبده حتي سقط طقم اسنانه, وانتهي الموضوع عند هذا الحد مؤقتا
ليست هناك تعليقات:
إرسال تعليق